Volg ons op Facebook

Negester KK Website banner 600x163px proef2

Hartman en seuns slagtery - van toeka tot nou

Written by  Staff | December 15, 2015

Inwoners van George sal goed vertroud wees met die Hartman & Seuns-slagtery wat al van die laat 1980’s uitmuntende vleis op die dorp verskaf.

Met die Laingsburg Abattoir en die Hartman Fabriek in George ook onder ons vaandel, kan daar na elke kliënt se behoefte omgesien word, hetsy dit die groothandelbedryf vir herverkope, die kleinhandelbedryf vir eindverbruikers, of die hotel- en restaurantbedryf is.

Volgens pa, Andries Hartman, wat al meer as 50 jaar in die bedryf is, het alles begin op hul familieplaas in die Oos-Kaap naby Sunland (Sondags Rivier Vallei) waar hulle oorspronklik ‘n algemene handelaarswinkel gehad het. Die besigheid het ook met ‘n familieslaghuis en klein slagpale gespog.

“Ons het altyd geweldig vroeg opgestaan om te ry na vendusies waar ons lewende hawe aangekoop het.”

“Ons het altyd geweldig vroeg opgestaan om te ry na vendusies waar ons lewende hawe aangekoop het.” Die seuns spot en vertel dat dit is waar hulle hul liefde vir ‘n lekker koppie boeretroos ontwikkel het. “Dis maar moeilik om dou voor dag in die pad te val sonder ietsie wat die oë oophou en jou kiertsregop laat sit,” sê Hartman Junior.

Pa Andries onthou dat ‘n heel Karoo lam jou in 1964 ‘n hele nege rand uit die sak sou jaag. “In 1989 het ‘n lam jou R120 gekos en vandag draai hy al hier by die R1 200. G’n wonder dat mense altyd vra of die vleis sag is nie, veral deesdae, want dis duurder as goud.”

Jurie Hartman, wat tans die kleinhandelslaghuis bedryf, het van ‘n jong ouderdom sy eie skaapkudde gehad en die potensiële goeie bouvorm van ‘n dier op die hoef leer ken, hetsy dit nou bees, lam of teeldiere vir kudde-verbetering is. Volgens hom moet ‘n goeie slagter basiese vaardighede hê in sny en saag. ‘n Hoë standaard van higiëne moet ook gehandhaaf word, en dan natuurlik basiese kennis van die anatomie van die dier. “Alles word beloon met goeie terugvoer van die kliënt,” sê Jurie. Hy voeg by dat die slaghuis met groot supermarkte kan kompeteer, omdat hulle ‘n persoonlike diens bied wat veroudering en spesialis snitte insluit.

Junior, wat die groothandelafdeling bestuur, praat passievol oor vleis. “Ons lê altyd klem op kwaliteit. Die kwaliteit van ons verskaffers en die diere wat ons by hulle koop. Kwaliteitdiens wat ons lewer aan kliënte, maak nie saak wat hulle versoek is nie, en kwaliteitwerksomgewing vir mense om in te werk. Sonder ordentlike waardes en ‘n egte toewyding daaraan, kan mens nie vir lank ‘n suksesvolle besigheid bedryf nie. Ek dink die feit dat ons nou al vir so lank in die bedryf is en goeie diens lewer aan mense, is bewys dat ons hierdie beginsels toepas en nie net mooi woorde op papier sit nie. Verhoudings is waarop als geskoei is.”

decjan2016 kos hartmans 1

Die drie manne vertel wat hul gunste-ling snitte is vir die feesseisoen en glans-kok Francois Ferreira verskaf resepte om die beste uit die vleis uit te kry.

Junior se gunsteling:

Heel Geroosterde Afrikaner Rib-Eye Steak

Bedien 4-6
1 Heel rib-eye (ongeveer 800g – 1,2kg)
1 vinger gemmer, gerasper
2 knoffelhuisies, fyngedruk
5ml groen peperkorrels, fyngedruk
10ml seesout
60ml olie
30ml suurlemoensap
Ekstra olie om die vleis te seël.

Voorverhit die oond op 240C. Meng die gemmer, knoffel, peperkorrels, sout, olie en suurlemoensap saam. Smeer die mengsel oor die hele rib-eye steak.

Verhit die ekstra olie in ‘n groot kastrol en seël die rib-eye steak op al die kante. Plaas die geseëlde snit vleis in ‘n oondpan en rooster op 240C vir 10 minute. Haal die pan uit die oond en bedek met foelie.

Verlaag die oondtemperatuur na 180C en plaas die steak in die oond vir nog 30 minute. Haal uit die oond uit en laat rus in ‘n warm plek. Sny en bedien.

Pa Andries se bobaas boud:

Gesogte Laingsburg-lamsboud met heuningmasala bedruipsous

Bedien 6
Skaapboud (ongeveer 1,2kg)
15ml knoffel, fyn gekap
Sout en vars gemaalde peper na smaak
60ml olie
3 uie, dik gesny
Heuningsous
125ml heuning
250ml water
125ml soetrissiesous
60ml garam masala

Voorverhit die oond teen 180C. Sny die vel en die vet van die boud af. Meng die knoffel, sout, peper en olie saam en smeer die mengsel goed oor die boud. Verhit ‘n pan en seël die lamsboud aan alle kante. Meng die bestanddele vir die heuningsous en bring dit tot kookpunt.

Plaas die uie op die bodem van ‘n oondbak en plaas dan die lamsboud bo-op die uie. Gooi die sous oor die lamsboud. Bedek met foelie en plaas in die oond om te rooster. Haal die lam elke 20 minute uit die oond en bedruip met die pansous. Rooster vir 2 ure.
Haal die lamsboud uit die oond en sit dit eenkant om te rus. Sny die lamsboud en bedien met romerige kapokaartappels en geroosterde groente.

Jurie se aanbeveling:

Geroosterde Varkboud

Bedien 6
1,5kg heel varkboud (gerook of nie-gerook)
3 liter appelsap
250ml sider
2 middelslag uie
10 naeltjies
4 knoffelhuisies
2 lourierblare
45ml heuning

In die grootste pot wat jy het plaas die knoffel en uie. Druk dan die naeltjies in die uie in en voeg die lourierblare ook by in die pot. Plaas nou ook die varkboud in die pot. Gooi 1 liter van die appelsap oor die varkboud, dan die sider – afhangend van hoe vol jou pot is, voeg nog appelsap by, totdat die varkboud heeltemal bedek is.

Bring tot kookpunt en skep die skuimlaag af met ‘n gaatjieslepel/gleuflepel.
Prut vir 1 uur en 20 minute. Sit die oond af en los die varkboud in die vloeistof totdat jy dit nodig het.

Verhit die oond op 190C. Sny ekstra vet af en maak ‘n diamant kruis-patroon bo-op die varkboud. Smeer 45ml heuning bo-oor die varkboud. Rooster in ‘n groot oondroos-terpan in die oond vir 20 minute – hou ‘n ogie op dit om seker te maak dat dit nie brand nie.  Geniet dit warm of koud.

decjan2016 kos hartmans 2